O ciclo de concertos Blues & Rías presenta desde Phoenix, Arizona (EE. UU.) ao “power trio” de blues rock THE BLACK HOLE, unha das bandas máis prometedoras do mundo no xénero.

Trátase dunha nova aposta da promotora viguesa FB ProduXion, que leva tres anos traendo a Galicia artistas internacionais da música afroamericana.

The Black Hole é unha banda explosiva de blues rock que conquistou o corazón de fans de todas as idades e de todo o mundo coa súa refinada musicalidade e o seu talento consumado para o espectáculo. Dende 2022, realizaron xiras con entradas esgotadas como cabezas de cartel en Estados Unidos, Sudamérica e Europa, e publicaron seis discos de produción propia. En xullo de 2025 asinaron con Greater Than Distro para lanzar a súa música a través de Virgin Music/Universal Music Group.

Ganaron o Arizona Blues Challenge 2023 e foron semifinalistas do International Blues Challenge 2024 en Memphis, Tennessee, situándose entre as 20 mellores bandas de blues independentes do mundo. Compartiron escenario con artistas de renome como Charlie Musselwhite, Lee Oscar, Jon Nemeth, Eddie 9V, Sublime with Rome, Kool & The Gang, entre outros. En setembro de 2025 tocarán con Samantha Fish na súa xira mundial Paper Doll.

The Black Hole está formado polo guitarrista e vocalista Connor Kelly e o batería Levi Velasquez, presentándose en directo como trío con unha formación cambiante de baixistas de primeira liña. Teñen a súa base en Phoenix, Arizona, onde compoñen, graban e interpretan música nova de forma constante, e realizan xiras con regularidade por Norteamérica, Sudamérica e Europa.

Entradas