É unha acción performativa que se presenta en Vigo como resposta artística aos acontecementos ocorridos en Irán entre o 8 e o 9 de xaneiro, tras unha semana de manifestacións pacíficas reprimidas polo réxime mediante un apagamento total das comunicacións e unha violenta represión da poboación civil.

A obra parte do apagamento de internet, mensaxes e chamadas móbiles como estratexia de control e silencio, e aborda as consecuencias desta interrupción forzada: a ocultación da violencia, a imposibilidade de dar testemuño e a negación da memoria colectiva.

A intervención propón un espazo de memoria e responsabilidade, no que o corpo se converte en arquivo e testemuña. Sen reproducir o horror, SANGUE NO ESPELLO fai visible a súa pegada e convida o público a reflexionar sobre a fraxilidade da luz, da información e dos dereitos fundamentais cando son interrompidos pola forza.

A través do movemento e da presenza escénica, a peza establece un diálogo entre o sucedido en Irán e a responsabilidade do espectador, apelando a non apartar a mirada e a cuestionar a comodidade da indiferenza fronte á vulneración dos dereitos humanos.

A acción é tamén unha chamada á solidariedade e á memoria, e unha afirmación da dignidade dun pobo que continúa loitando pola súa liberdade.

Unha proposta de Mim Shayan, coa participación de Mar Yam Mah.