Sandar a fenda patriarcal

Os días 8 e 15 de setembro o Museo Liste acollerá `Sandar a fenda patriarcal´, obradoiros literarios impartidos por Andreia Costas (escritora e audiovisual) e realizados en colaboración coa Asociación Mulleres e Palabras que ven traballando co Museo dende hai tempo en diversas propostas e que constitúe, dentro do movemento asociacionista, un activo instrumento de cambio fronte ás violencias machistas promovendo a visibilización do papel social da muller e alentando a súa participación na comunidade.

Obxectivos:
Con esta experiencia formativa trátase de conseguir, a través da escrita creativa, sandar a fenda patriarcal individual como traballo de empoderamento feminista global acadando os seguintes obxectivos:

• Xerar conciencia e coñecemento.
• Sensibilizar e informar sobre a necesidade dun reparto equitativo do traballo no fogar e dos coidados.
• Estudar os aspectos de prevención, protección e reparación en materia de violencia de xénero.
• Visibilizar, sensibilizar e prever sobre outras formas de violencia contra as mulleres.
• Crear un espazo de confianza para as mulleres onde poidamos escoitarnos unhas a outras e comprendamos que non son problemas individuais, son problemas da sociedade patriarcal e esta temos que erradicala.

Metodoloxía:

• Reflectir na escrita a experiencia de feridas, traumas, discriminacións machistas e traballar en pro da igualdade e os dereitos das mulleres.
• Utilizar unha linguaxe inclusiva que modifique a sociedade no seu pensamento machista deconstruíndo a masculinidade hexemónica.
• Realizar exercicos de consciencia plena de movemento e respiración (técnicas de mindfulness, biodinámica, biodanza e meditación) que propician o movemento vital e intelectual movendo os marcos dos estereotipos de xénero.
• Fomentar a conciencia de grupo con xogos literarios, lecturas e discusións.
• Afondar nos textos de figuras literarias tan distales como Rosalía de Castro e Emilia Pardo Bazán, que representan dous modelos diferenciados de escritoras dende unha interpretación feminista. Este será o punto de partida para un discurso
  de conciliación entre os diferentes bloques e posicións feministas dende a creación e o respecto.

Podes inscribirte a través do enderezo electrónico recepcion@museoliste.org ou whatsapp 655 823 803.