Noitebras Teatro leva ao escenario Retablo do Esperpento, unha adaptación de dúas pezas de Ramón María del Valle-Inclán: Ligazón e Rosa de Papel. A compañía fusiona ambas obras nunha única proposta teatral que afonda nos temas da luxuria, a avaricia, a liberdade e o destino a través da estética esperpéntica do autor galego.

A historia sitúanos nunha familia de meigas na que unha moza trata de resistirse aos plans da súa nai e da súa tía, decididas a obter proveito dos favores dun home rico. A aparición dun humilde afiador e unha visión do futuro durante unha noite de luar levarana a tomar unha decisión que cambiará o rumbo da súa vida.