O Auditorio da SDC Atlántida de Matamá acollerá a representación de Retablo do Esperpento, a nova proposta de Noitebras Teatro, unha adaptación que mergulla ao público no universo de Valle-Inclán a través da fusión de dúas das súas obras, Ligazón e Rosa de Papel. A historia sitúanos nunha familia de meigas onde intereses, ambicións, supersticións e pactos de sangue marcarán o destino dunha moza decidida a desafiar o seu futuro.

A compañía, formada por actores procedentes da Escola Municipal de Teatro de Vigo e outras escolas dramáticas da comarca, estrea con esta montaxe unha proposta que combina o espírito do esperpento cunha reflexión arredor do destino e da liberdade persoal.