Un espectáculo único de narración oral escénica no que Quico Cadaval celebra 30 anos de historias contadas coa súa mestría habitual. Notas de Rodapé convida o público a viaxar coa imaxinación entre contos reais e inventados, memoria e ficción, humor e poesía. Un recital irrepetible de teatro da palabra onde cada función é tamén un milagre escénico.

SINOPSE:

Quico Cadaval percorre, dende hai tres décadas, os camiños da memoria e da imaxinación, guiado pola complicidade do público. En Notas de Rodapé, comparte os seus segredos de contador, facendo do escenario un espazo vivo e imprevisible onde cada historia é unha aventura compartida. Entre contos de lareira, cabaret literario e teatro épico, Cadaval mestura memorias inventadas, lembranzas infantís e escenas de western, aderezadas con comentarios irónicos —as “notas de rodapé”— que iluminan e transforman cada relato. O espectáculo comeza cun morto nunha encrucillada e remata co conto máis fermoso do mundo; polo medio, o que o público mande. Porque contar é abrir camiños ao inesperado, e escoitar pode ser o milagre do día.