Festa aniversario Puro Delirio

Gastronomía e diversión son as premisas deste local da zona vella comandado polos irmáns Carlos e Paula Puga desde 2021. Para celebrar os tres anos desde a inauguración, o xoves 29 de agosto teñen preparada unha xornada chea de actividades e sorpresas. Estamos ante un concepto anovador para entender a hostalería; cada mes a decoración do establecemento cambia de xeito radical e cada semana prográmanse diferentes actividades.

O próximo xoves 29, convídannos a unirnos a súa tripulación pirata. Arrancan a xornada ás 13:00 h cun brinde pirata, no que convidarán a todos os asistentes a un cóctel de cortesía, acompañado duns deliciosos petiscos da casa. Entre as 13:30 h e as 15:30 h, ofrecerán unha versión especial do menú do día, deseñado para a ocasión, cun prezo de 14,00 €. A diversión continuará co Tardeo Pirata desde as 16:00h ata as 20:00h, os actores-camareiros de Puro Delirio interactuarán cos asistentes, animando a tarde con xogos e outras sorpresas. Ademais, quen queira poñer a proba as súas habilidades pode unirse ao escape room que teñen preparado polo Casco Vello e para o que hai dúas quendas, ás 16:30 h ou ás 18:00 h, cun prezo de inscrición de 5,00 €. Para pechar a tarde, de 19:30 h a 20:00 h, celebran un concerto homenaxe aos seus tres anos, da man de Paula Puga, unha das almas detrás dese delirio. E porque non hai celebración sen un toque gastronómico, ás 20:00 h comeza unha Cata a Cegas dirixida pola outra alma do delirio, Carlos Puga, unha versión máis lixeira das ceas a cegas que ofrecen todos os meses. Esta cata inclúe tres pratos e dúas bebidas, por só 6,00 € por comensal. Nunha celebración tan especial, non podía faltar o seu clásico escape room dunha hora, que dará comezo ás 21:30h. En equipos de 2 a 6 persoas, os valentes que se inscriban poden enfrontarse a desafíos mentres gozan dunha consumición incluída por só 10,00 €.

Para participar nas actividades, en especial nos xogos de escapismo e na cata a cegas é imprescidible reservar praza por Instagram @purodeliriovigo ou chamando ao 986 046 536.