Proxección 'Segredos adolescentes' + faladoiro

Este mércores 31 de maio, ás 19.30h, preséntase en Vigo un proxecto sobre segredos: diarios de adolescencia feminina, cultura de dormitorio, escrita íntima, espazos propios. Unha investigación que durante os últimos 5 anos recolleu diarios secretos, escritos por mulleres diversas cando eran nenas, mozas, escritos para ninguén, para elas mesmas. Eses libros, reunidos e abertos por primeira vez, falan da mocidade en primeira persoa, trasladando un relato distinto, íntimo, ousado, da experiencia medrar como muller na nosa sociedade.

O proxecto consiste nunha recollida de obxectos e memoria oral en torno ás escritas do eu e a partir do obxecto do diario íntimo. Co arquivo recompilado durante os pasados anos, a investigadora e cineasta lucense  Xiana do Teixeiro, que coordina o proxecto, está a construír uhna longametraxe documental “íntimo e colectivo ao tempo”, segundo a directora; tamén se teñen feito exposicións e publicacións editoriais.  O día 31 de maio preséntase no espazo A Morada (Enrique X Macías, Vigo), nunha actividade con espazo para compartir materiais e fragmentos do filme en produción e un faladoiro coas asistentes. As persoas participantes están convidadas a traer lembranzas, memorias ou obxectos do universo dormitorio adolescente / diario íntimo.

“O diario é un obxecto que se adoita presentar como regalo ás nenas cando son aínda cativas. Nalgúns casos, a nena-moza convértese en dona da páxina, fai dese lugar o seu espazo propio (ás veces, o único do que dispón). Esa relación ca escrita íntima, esas cartas a unha “eu” futura, despregarán ramificacións durante toda a nosa vida. A nosa investigación parte do diario adolescente, pero interésanos todo o que ten que ver con esa escrita feminina non produtiva: a conservación, a destrución, a herdanza, o descubrimento. Neste eido xorden posibilidades potentes como as de xenealoxía e grupo”, comenta a cineasta.

A investigación do “Proxecto Diario” segue aberta, esta semana en Lugo poderanse achegar contribucións e ideas á equipa do filme. A cita é no espazo A Morada, iniciativa feminista de Vigo, que acolle unha cita para coñecer e formar parte dun proxecto sobre memoria intanxible e materiais invisibles (literarios, gráficos, emocionais, íntimos).

Xiana do Teixeiro é cineasta. A súa primeira longametraxe, a multipremiada Tódalas mulleres que coñezo, rodada en Galicia, é un dos filmes documentais máis vistos en pantallas non só cinematográficas senón de espazos de educación e pensamento. A película, un documental empoderador sobre espazo público, xénero e liberdade, continúa a ser empregado como recurso educativo en distintas comunidades autónomas, despois de ter sido estreado en 4 continentes. O filme formou parte durante este curso escolar dunha oferta educativa promovida pola área de Igualdade (Concello de Vigo), en forma de obradoiro para a convivencia non violenta e máis participada dos nosos espazos compartidos.