Erik Harley, experto en Estudos Urbanos e creador do termo «Pormishuevismo», un falso movemento artístico que investiga a arquitectura especulativa e corrupta, visítanos para presentar este libro no que nos guía a través de doce fascinantes rutas por todo o territorio español, explorando o malgasto de diñeiro público en custosas construcións cuxa marca indeleble está presente nas nosas paisaxes. Estas rutas percorren paraísos pormishuevistas de España coa máis variada temática: xogos olímpicos, exposicións universais, rañaceos a pé de praia, rotondas inimaxinables, cidades de todo tipo (da cultura, das artes e as ciencias, das vacacións?) e moitos, pero moitos millóns de euros.

Armado co seu casco de obra, humor, desenvoltura e datos demoledores, Erik desvela algúns dos segredos que se esconden detrás destes proxectos construtivos, permitíndonos comprender mellor a historia recente do país ibérico a través da súa arquitectura, os seus monumentos e os debates que suscitou tanto malgasto. O libro inclúe mapas cos itinerarios, unha xenerosa edición gráfica e numerosos códigos QR que enlazan a vídeos pormishuevistas, cancións e noticias da época, para que non perdas detalle e poidas realizar as mesmas rutas que fai Erik con Oficina Periferia.