A asociación Évame Oroza acolle a presentación de MEMORIA RAM: CERO, o primeiro poemario de Francisco Castro, unha obra na que o escritor vigués explora as fronteiras entre a memoria, a identidade e o universo dixital. O libro propón unha poesía contemporánea onde o amor, o desexo ou a ferida dialogan con algoritmos, pantallas e cidades, formulando preguntas sobre a liberdade e o lugar do ser humano nun mundo cada vez máis condicionado pola tecnoloxía.

No encontro participarán o propio Francisco Castro, a escritora Silvia Penas e o editor Xabier Romero, nunha conversa arredor desta nova faceta literaria dun dos nomes máis recoñecidos das letras galegas actuais. Traducido a varias linguas e autor de obras como Chamádeme Simbad, Tes ata as dez ou Eva tomando o sol, Castro presenta agora unha proposta lírica que converte a poesía nun espazo de reflexión, resistencia e procura persoal.