Inés Sáinz presenta o seu novo libro Seducir con tus sentidos este venres 9 de maio ás 19.30 horas na planta 7ª do Corte Inglés. A autora estará acompañada do editor Jorge Alonso.

Inés Sáinz, quen saltou á fama ao proclamarse Miss España en 1997, desenvolveu unha ampla traxectoria como modelo, presentadora de televisión, consultora de comunicación e empresaria. A súa experiencia no mundo da imaxe e as relacións públicas levouna a converterse nunha recoñecida asesora de marca persoal para figuras públicas e grandes empresas.

Ademais, é autora de varias publicacións e produtora de contidos. Nesta nova obra, Seducir con tus sentidos, Inés Sáinz expón unha innovadora forma de entender a comunicación e as vendas: seducir a través dos sentidos. Baseándose na súa experiencia profesional e en numerosos exemplos reais, propón neste ensaio técnicas para mellorar o trato con clientes, optimizar a atención comercial e converter calquera interacción, tanto profesional como persoal, nunha experiencia sensorial memorable.

Máis que un manual clásico de vendas, a obra é unha auténtica masterclass sobre como construír vínculos emocionais en sectores como moda, cosmética, decoración, xoiería ou gastronomía -aínda que os seus principios son aplicables tamén a automoción, inmobiliaria e, en xeral, a calquera relación humana, persoal ou profesional-. Unha obra fresca, práctica e inspiradora que pon en valor a empatía, a persuasión e o poder dos pequenos detalles á hora de comunicar e convencer.