O Café UF acollerá a presentación pública do novo selo musical impulsado por Sinsalaudio e financiado polo Ministerio de Cultura. O proxecto propón unha aproximación singular á creación sonora contemporánea, combinando gravacións directas en vinilo, discos de cerámica reproducibles, artesanía e tecnoloxía analóxica.

A xornada comezará cunha escoita das primeiras gravacións publicadas polo selo e continuará cun recital de Os Lindes. Ademais, o público poderá coñecer de primeira man os detalles desta iniciativa da man de Álex Cancelo, impulsor do proxecto, e da ceramista Olalla Lojo, responsable da creación das pezas cerámicas reproducibles que forman parte da proposta.