O Real Club Celta acollerá o próximo mércores 25 de marzo, ás 20:00 h, no Salón Rexio da súa sede en Vigo (Rúa do Príncipe, 44), a presentación do libro Afouteza Celtista, obra de Manuel Bragado que percorre máis de tres décadas de historia e paixón polo celtismo.

A cita contará coa presenza do propio Manuel Bragado, así como de Sergio Álvarez, conselleiro do RC Celta; Xabier Romero, editor; e os xornalistas Juan Carlos Álvarez (Faro de Vigo) e Jacobo Buceta, que participarán nun diálogo sobre a obra e o seu significado dentro da cultura deportiva e social de Vigo.

‘Afouteza Celtista’ reúne unha selección de prosas celestes nas que Bragado constrúe unha memoria emocional e crítica do club. Dende a perspectiva dun abonado de Río Alto, o libro rescata momentos fundamentais da historia do Celta: a súa fundación, o simbolismo das cores, a sacralidade de Balaídos e a identidade competitiva que define a súa afouteza.

Entre a crónica e o ensaio, os textos combinan a paixón do afeccionado co rigor do escritor, incorporando a retranca e a fala viguesa como elementos narrativos que achegan autenticidade e proximidade a cada relato. Así, o lector percorre tanto as xornadas de gloria como os momentos difíciles que forman parte do ADN do celtismo.

O libro non só se detén na memoria histórica, senón que tamén analiza o presente e o futuro do club, destacando a revolución recente impulsada por Claudio Giráldez, capaz de consolidar un novo celtismo global, interxeracional e cheo de proxección.

‘Afouteza Celtista’ é, por tanto, moito máis que un libro sobre fútbol: é un testemuño de identidade, paixón e cultura viguesa, imprescindible para calquera que sinta o Celta como algo máis que un equipo. A presentación ofrecerá a oportunidade de coñecer de primeira man a visión do autor e de debater sobre a historia e o futuro do club.