O libro é un compendio selectivo dunha vida dedicada, en dúas fases, finalmente coincidentes, ao xornalismo e á docencia universitaria da comunicación, especialmente asentada no Dereito e na ética que debe presidir o exercicio decente deste oficio. É posible que queden cousas por contar e que sorprendan algunhas minucias do relato, sobre todo se se comparan cos espazos máis solemnes das personaxes de incuestionable relevo que tivo ocasión de coñecer, tratar e entrevistar; é dicir, experimentar a proximidade con quen foron no seu tempo destacadas figuras da nosa historia en todos os ámbitos.

É un relato xornalístico de historias cotiás ao longo de máis de medio século de crónica ordinaria de todo tipo de episodios. E volverán desfilar toda caste de personaxes, maiores e menores, tan diversos como o xeneral Enrique Líster, o líder da CEDA, Gil Robles; o empresario José Fernández ou o xeneral Gutiérrez Mellado; Celia Gámez ou a propia Cicciolina, ou o último corneta da Guerra de Cuba.

Tamén recupera crónicas de sucesos, desde o chamado Caso REACE ata outras fraudes e delitos; pero compénsao con divertidas historias, anécdotas e o recordo de personaxes entrañables. En suma, de todo un pouco, sen esquecer a memoria do movemento obreiro, tan importante en Galicia na loita polas liberdades.

O libro divídese en once capítulos e unha reflexión final. No conxunto, quixo compensar toda unha vida de case sesenta anos, ata o presente, ocupando todas as funcións dun xornalista desde a afastada radio ata os actuais medios dixitais. Comeza co meu propio inicio e remata cunha reflexión preocupada sobre o futuro do exercicio da liberdade de expresión e do xornalismo documentado e crítico.