O 32º Festival Internacional de Jazz e Blues de Pontevedra celebrarase do 3 ao 7 de agosto na Praza da Ferraría, cun programa gratuíto que reúne figuras internacionais e destacados artistas galegos. O cartel inclúe as actuacións de Layuca, Juzz, o prestixioso trompetista noruegués Nils Petter Molvær co seu proxecto Khmer, Raphael Wressnig’s Soul Gift xunto á cantante Gisele Jackson e o Cyrille Aimée Quartet. Ademais dos concertos nocturnos, o festival contará cada día coa animación de rúa da Brass Atlantic, levando o jazz ás rúas da cidade con pasarrúas e actuacións ao mediodía e ao serán.

Todos os concertos son ás 22:30

3 de agosto – Layuca
Banda galega de afrofunk creada en 2022 arredor dun cuarteto galego-cubano con ampla experiencia na escena musical. A súa proposta mestura funk contemporáneo, jazz, blues, rock mestizo e ritmos afrocubanos, destacando pola forza do directo e unha potente sección de ventos que convida ao baile. En 2025 publicaron o seu primeiro EP, Para sentir +.

4 de agosto – Juzz
Proxecto liderado polo guitarrista galego Virxilio da Silva, cun estilo que transcende as etiquetas do jazz para incorporar influencias do rock psicodélico, o pop experimental, o noise ou o stoner. A banda aposta pola liberdade creativa e por unha proposta sonora persoal e innovadora.

5 de agosto – Nils Petter Molvær – Khmer
O trompetista, compositor e produtor noruegués é unha das figuras fundamentais do jazz europeo contemporáneo. A súa música combina jazz, electrónica e improvisación, e o seu álbum Khmer (1998) converteuse nun referente ao fusionar jazz con hip-hop, ambient, techno e drum’n’bass. En Pontevedra presenta unha revisión deste traballo emblemático.

6 de agosto – Raphael Wressnig’s Soul Gift feat. Gisele Jackson
O austríaco Raphael Wressnig é un dos grandes especialistas do órgano Hammond B-3. O seu grupo mestura soul, blues, rhythm & blues e funk cun estilo enérxico e contemporáneo. Nesta ocasión estará acompañado pola cantante estadounidense Gisele Jackson, que formou parte do coro de Ray Charles e colaborou con artistas como Donna Summer ou James Brown.

7 de agosto – Cyrille Aimée Quartet
A cantante franco-dominicana Cyrille Aimée é unha das voces máis recoñecidas do jazz actual. Premiada no Festival de Jazz de Montreux e finalista do concurso Thelonious Monk, desenvolveu boa parte da súa carreira nos Estados Unidos, onde colaborou con figuras como Wynton Marsalis. O seu repertorio combina a tradición do jazz con influencias da música latina e unha gran capacidade interpretativa.

Do 3 ao 7 de agosto – Brass Atlantic (Jazz pola rúa)
A programación complétase coa presenza diaria de Brass Atlantic, formación de rúa integrada por saxos, trombón, tuba e batería que levará o jazz aos espazos públicos da cidade con actuacións ás 12.30 e ás 20.00 horas.