O festival de balde e familiar regresa os días 11 e 12 de abril cunha mestura perfecta de música en directo, obradoiros creativos e actividades para os máis pequenos na Baixada á Praia de Saiáns.

As Picnic Sesións xa son unha cita imprescindible no calendario cultural de Vigo. Esta quinta edición, que se estenderá tamén aos días 9 e 10 de maio, arranca o seu primeiro asalto este vindeiro sábado 11 e domingo 12 de abril en Saiáns. O recinto, situado na Baixada á Praia 83 (xunto á Escola Infantil Municipal Costeira), transformarase nun espazo de convivencia onde a natureza, a cultura e a comunidade serán as grandes protagonistas.

PROGRAMA DE CONCERTOS:

O cartel desta fin de semana ofrece unha gran variedade de estilos, desde o rock e o funk ata o blues:

• Sábado 11: A música comeza ás 12:30 h co espectáculo familiar de A Banda dos Insectos. Pola tarde, pasarán polo escenario os Alumnos Gain Over ás 14:30 h, o son de Sun Iou ás17:00 h e o peche enerxético de Mambas Negras ás 19:00 h.
• Domingo 12: A xornada arranca cunha charla musical sobre formación e oportunidades para grupos emerxentes ás 11:30 h, seguida do humor de Peter Punk ás12:30 h. A tarde será para bailar con La Yuca Funk ás14:30 h, Red Duck Blues ás17:00 h e unha divertida clase de baile Lindy Hop ás 19:15 h.

OBRADOIROS E CREATIVIDADE:

Ademais dos concertos, o festival aposta pola aprendizaxe e a artesanía con espazos dedicados á creación:

• Maruca Cerámica: ofrecerá o obradoiro ‘Decora o teu prato’ (collage + cerámica) o sábado ás 16:30 h e o domingo ás 16:00 h.
• El Rincón de Juliet: a través deste taller os asistentes poderán crear ‘A pulseira que fala de ti’ en diferentes quendas de mañá e tarde (13:30 h e 18:30 h o sábado e 18:00 h o domingo).

INMERSIÓN LINGÜÍSTICA PARA NENOS:

Unha das grandes novidades desta edición é a colaboración con Kids&Us, que traerá actividades en inglés para nenos e bebés. Desde contacontos como ‘Mousy & The Big Red Ball’ ata obradoiros de ‘Arts & Crafts’, os máis novos poderán aprender xogando nunha contorna natural.

Como é habitual, o recinto contará con zona de mercado e foodtrucks, garantindo que as familias poidan pasar o día completo desfrutando da gastronomía e o deseño local. A entrada é totalmente gratuíta, reafirmando o espírito aberto dun festival que non deixa de medrar en Saiáns.