O vindeiro domingo 18 de setembro, de 12:00h. a 20:00h., terá lugar en Vigo a terceira edición do evento fotográfico solidario “PHOTOCAN SKÖLLDOG”. Será no Bar Tinta Negra, situado na rúa Irmandiños 2, en pleno centro da cidade!
O evento é a favor de tres protectoras de animais: “Vos Biosbardos”, “Proxecto Gato” e “A Illa de Tali”. Constará das seguintes actividades:

• Photocall: é a actividade principal. Todos os interesados poderán sacarlle unha foto á súa mascota grazas á fotógrafa Skölldog. O prezo da foto será de 8 euros, dos cales 4 irán destinados integramente ás protectoras. A foto será editada e entregarase tanto en formato dixital como en papel (a recoller na papelería Folder na rúa Progreso 22, baixo, Vigo). Con cada foto regalarase unha bolsa de chuches para o teu peludo, un adhesivo do evento e unha rifa.
• Sorteos: venderanse rifas por un importe de 2 euros que irán destinados de maneira integra ás protectoras. O sorteo celebrarase o día 20 de setembro a través das redes sociais. Haberá premios como unha sesión de fotos, almorzos e ceas, tatuaxes, unha fin de semana en furgoneta… e moitos máis!
• Mercadillos: as protectoras estarán a vender os seus artigos para poder sufragar os gastos do refuxio (facturas, comida, desparasitaciones, mantemento…). O recadado irá de maneira íntegra á protectora.
• Recollida de alimentos: teremos un punto de recollida de alimentos, produtos de limpeza, correas e colares, xoguetes, mantas, produtos de desparasitación… todo o necesario para que a vida no refuxio sexa o máis fácil posible.
• Photocall dos colaboradores: haberá un segundo photocall gratuíto con todos os logos dos nosos colaboradores para poder subir ás redes sociais ao momento. Sen eles isto non sería posible!
• Charla: as protectoras explicarán ao longo do día como funciona un refuxio, o seu financiamento, o voluntariado, a importancia das adopcións…
• Pequena exposición de fotografías de Skölldog no interior do local.
• Pub e sesión DJ ao longo de todo o día.

  Vigo é unha das cidades galegas con máis cans censados, a pesar diso, carece de espazos e vantaxes para os nosos peludos se a comparamos con outras cidades dos arredores, sen ir máis lonxe.
  Con este evento tamén queremos darlle voz a esta parte tan numerosa da nosa sociedade, os cans vigueses.
  Queremos máis actividades, menos espazos prohibidos, máis zonas para os nosos mellores amigos de catro patas!