PERPETUANDO A PERPETUA

Este mércores 4 de outubro ás 19.00 terá lugar no MARCO (Galería A3, planta baixa) a presentación do libro A fotógrafa Perpetua e do proxecto Perpetuando, con Olaia Sendón e Mar Caldas.

Perpetua sempre quixo ser fotógrafa, o mellor oficio do que hai! As fotos que fai contan historias, explican o mundo e axudan a recordar as cousas e a xente que se foron deixando atrás. Ser fotógrafa é marabilloso. Este libro ilustrado, que tamén é un álbum de fotos, conta a vida de Perpetua, e tamén algo máis, porque en todas as súas imaxes hai un segredo agochado.

Ao abeiro deste libro, nace o proxecto fotográfico Perpetuando, feito entre a Escola de Imaxe e Son e a escola de BBAA de Pontevedra, que pretende recrear como tería sido a historia da fotografía se a igualdade fora unha realidade dende sempre. Construíndo dende a utopía un mundo sen discriminacións de xénero que deixa patente que a nosa mirada sobre a fotografía é herdada dos ollos dun home.