O MARCO presenta Pena miga, a primeira gran exposición en Vigo do artista portugués Francisco Mendes Moreira (Coimbra, 1979), creador autodidacta cunha obra recoñecida internacionalmente pola súa liberdade formal e pola súa capacidade para construír universos visuais moi persoais. A mostra reúne pinturas, colaxes e pezas realizadas con materiais reciclados, como cartóns, teas, manteis ou papel maché, nun percorrido que combina figuración e abstracción, humor e misterio, e referencias que van desde Brueghel ou Picasso ata Bob Dylan, Kerouac ou a banda deseñada.

A través de obras como Flock, Backpack Almanac, 50 Ways to Leave Your Lover ou Someone to Talk To and a New Hiding Place, Mendes Moreira desenvolveu unha linguaxe artística propia na que os personaxes, as máscaras, os xogos de miradas e as escenas aparentemente cotiás crean relatos abertos á interpretación. A exposición poderá visitarse do 11 de xuño ao 27 de setembro no MARCO, en horario de martes a sábado de 11:00 a 14:30 e de 17:00 a 21:00 horas, e os domingos de 11:00 a 14:30 horas.