O Escenario do Paseo volverá formar parte da programación das Festas de Bouzas entre o 17 e o 21 de xullo cunha proposta que combina concertos, sesións DJ, retransmisións deportivas e colaboracións con diferentes colectivos da cidade. O espazo, situado no paseo de Paz Andrade, xunto ao mar, reunirá durante cinco xornadas máis dunha vintena de actuacións dirixidas a públicos diversos.

A programación inclúe artistas de estilos moi diferentes, desde rock, pop e rap ata electrónica e verbena, ademais da celebración do TRIUMM Sunsets All Day Long, a retransmisión da final do Mundial de Fútbol 2026 nunha pantalla xigante e colaboracións con iniciativas como A Iguana Club, La Jaranita e Origen Churruca.

A primeira xornada, o venres 17, estará protagonizada por Tony Lomba, un dos nomes máis vencellados á historia do escenario, xa que foi o encargado de inaugurar a súa primeira edición hai dez anos. Nesta ocasión actuará acompañado por Juanjo en dúas propostas diferenciadas. A primeira, baixo o formato Tony Lomba e a súa Música Lixeira, estará orientada ao público que goza do repertorio máis popular. Xa pola noite, ambos regresarán ao escenario cun espectáculo de carácter máis desenfadado que se consolidou como unha das citas habituais das festas. Entre ambas actuacións, e tamén ao remate da noite, Mich Golden encargarase da selección musical desde a cabina.

O sábado 18 chegará unha das principais novidades desta edición coa estrea de TRIUMM Sunsets All Day Long nas Festas de Bouzas. A cita reunirá durante toda a xornada algúns dos DJs máis coñecidos da escena electrónica viguesa e galega, entre eles DORR, Mario Vice, Jago Schwarz, Saúl Guanda, Javi Barral, Tropical Boy, Óscar Álvarez e Luisda. A programación continuará pola noite coas sesións de Alex G, Borja Martiño e Mich Golden. Ademais, no caso de que a selección española dispute o encontro polo terceiro e cuarto posto do Mundial de Fútbol 2026, o partido poderá seguirse no propio recinto mediante unha pantalla xigante.

O domingo 19 concentrará algunhas das actividades con maior afluencia de público. A xornada comezará co tradicional vermú e a paella, continuará coa actuación de Frans Banfield e Cristian García e, xa pola tarde, co concerto de Wondercovers. Ás 21.00 horas o escenario converterase tamén nun punto de encontro para seguir en directo a final do Mundial de Fútbol 2026.

Co obxectivo de facilitar a mobilidade e incrementar o espazo dispoñible durante a retransmisión do encontro e o posterior XIX Festival Poético Piromusical Cidade de Vigo – Vila de Bouzas, a organización retirará de forma excepcional as mesas e cadeiras da terraza durante esa xornada. Unha vez rematado o espectáculo pirotécnico, a programación continuará coas sesións de DJ Charlie e Dani Muñoz B2B Mich Golden.

PROGRAMACIÓN

VENRES · 17 DE XULLO

• 20.00 h · Tony Lomba e a súa Música Lixeira + Juanjo (directo)
• 23.00 h · Mich Golden (DJ set)
• 00.30 h · Juanjo & Lomba (directo)
• Peche da noite · Mich Golden (DJ set)

SÁBADO · 18 DE XULLO

• 13.00 h · TRIUMM Sunsets All Day Long (DJ set)

  • DORR
  • Mario Vice
  • Jago Schwarz
  • Saúl Guanda
  • Javi Barral
  • Tropical Boy
  • Óscar Álvarez
  • Luisda

Noite

• Alex G
• Borja Martiño
• Mich Golden (DJ set)

No caso de que España dispute o encontro polo terceiro e cuarto posto do Mundial de Fútbol 2026, o partido proxectarase no propio recinto.

DOMINGO · 19 DE XULLO

• 13.00 h · Vermú e Paella 36208
• 14.30 h · Frans Banfield & Cristian García (directo)
• 19.00 h · Wondercovers (directo)
• 21.00 h · Final do Mundial de Fútbol 2026

  • Pantalla xigante de 4 × 2 metros

• 22.45 h · XIX Festival Poético Piromusical Cidade de Vigo – Vila de Bouzas
• 23.45 h · DJ Charlie · Dani Muñoz B2B Mich Golden (DJ set)

LUNS · 20 DE XULLO

• 17.00 h · Posada (DJ set)
• 18.30 h · Alex García (DJ set)
• 21.00 h · NICKZZ (directo)
• 23.00 h · Estorben (directo)
• 01.00 h · La Iguana Rocks The Seaside

  • Komodo Kids
  • Echaide al Aparato

MARTES · 21 DE XULLO

• 18.30 h · La Jaranita

  • Iván Alonso
  • Gus García

• 23.30 h · Origen Churruca Loves Bouzas

  • DJ Charlie B2B Mich Golden
  • Cliquekids
  • Shameless
  • DJ Joss