A Fortaleza do Castro volve trasladar aos vigueses á época de outubro de 1719, marcada polo asedio inglés á cidade, e farao a través da representación teatral Vigo 1719: Unha loita esquecida, desenvolta no Patio de Armas da fortaleza. O espectáculo contará con 15 actores baixo a dirección de Jimmy Núñez.

O escenario escollido non é casualidade, xa que está directamente relacionado cos feitos históricos: a Fortaleza do Castro foi un dos puntos clave da defensa viguesa cando uns 5.000 soldados ingleses desembarcaron en Coruxo e Samil co obxectivo de tomar Vigo. Tras a caída de Bouzas, arredor de 800 vigueses, entre soldados e milicianos, refuxiáronse na fortaleza e resistiron durante varios días os intensos bombardeos ingleses.

A diferenza do ano pasado, cando a proposta apostaba máis polo humor e o teatro musical, nesta edición o ton da obra semella máis histórico e épico. A entrada será gratuíta ata completar a capacidade do recinto.