O bingo máis solidario volve un ano máis ao corazón do Casco Vello

PetardPop organiza no Plaff (Rúa Oliva 8) a súa xa tradicional PetardBingo Solidario de Nadal este domingo 29 de decembro a partir das 20:30h.

Este gala benéfica vén celebrando todo o Nadal desde hai xa 8 anos para recadar fondos para doar a asociacións da cidade olívica que fan un gran labor social.

Trátase de bingo retro nostálxico cheo de música e humor no cal, a través das liñas, bingos e múltiples sorteos que se realizan, as persoas asistentes poden gañar diversos premios doados polos máis de 30 patrocinadores que ceden os agasallos desinteresadamente para axudar á causa. Algúns dos agasallos que poderán gañar son ceas para dúas persoas, visitas de enoturismo a unha adega, masaxes faciais, sesións de fisioterapia, vales de compra, lotes de embutidos ibéricos ou unha gran cesta de nadal.

Ademais, ás 0:00h, tomaremos as uvas nunhas precampanadas moi especiais, que lembrarán algunha das badaladas televisivas históricas máis lembradas por todos.

Neste caso, as asociacións elixidas para recibir a recadación obtida no evento son ASDEGAL (Asociación Solidaria de Galicia, que promove a formación e coordinación de voluntariado que axuda á dignidade das persoas e o respecto á súa liberdade, así como a relación persoa a persoa, o apoio á familia, a constancia e o compromiso no traballo) e BICOS DE PAPEL, que axuda e apoia aos nenos oncolóxicos do Hospital Álvaro Cunqueiro e ás súas familias. Ambas as asociacións estarán representadas na gala, para dar a coñecer os seus proxectos e a súa misión aos asistentes.