O concello revelou esta mañá a actuación número once dos concertos deste verán no auditorio de Castrelos. O rock dos mexicanos Molotov porá Vigo patas arriba o xoves 16 de xullo. Pasarán pola cidade olívica co seu Frijoleuros Tour 2026, co que celebran tres décadas de traxectoria.

Molotov é unha banda mexicana de rock formada en Cidade de México en 1995, coñecida pola súa mestura de rap, funk e hard rock, así como polas súas letras irreverentes, satíricas e de forte crítica social e política. O grupo alcanzou proxección internacional co álbum ¿Dónde Jugarán las Niñas? (1997), convertido nun referente do rock latino contemporáneo grazas a temas como “Gimme Tha Power” ou “Frijolero”. Ao longo da súa traxectoria, Molotov consolidouse como unha das formacións máis influentes e provocadoras da música iberoamericana.

Programación provisional de Castrelos:

• 2 de xullo – Deep Purple
• 16 de xullo – Molotov
• 18 de xullo – Coral Casablanca
• 24 de xullo – Ópera Carmen
• 30 de xullo – Chayanne
• 1 de agosto – Noite de zarzuela
• 7 de agosto – Abraham Mateo
• 9 de agosto – Ópera Nabucco
• 11 de agosto – The Corrs
• 14 de agosto – Viva Suecia
• 15 de agosto – Iván Ferreiro