Os quioscos das praias de Vigo adiantaron este ano o inicio da súa actividade coa chegada da primavera. A nova regulación municipal permite a súa apertura desde finais de marzo, polo que xa están operativos, ofrecendo bebidas, ambiente relaxado, concertos e vistas privilexiadas.

O chiringuito da ETEA, ao pé dos impoñentes edificios abandonados da antiga Escola de Transmisión e Electricidade da Armada, a un paso da ría, arranca esta ponte a programación musical co concerto de Mala Herba o domingo 3. Os atractivos para nos achegar ata este chiringuito son varios. Por unha banda, estamos nunha contorna natural, afastada do tráfico, á sombra do monte da Guía e con acceso directo ás praias da Punta e de Ríos. A zona foi obxecto de varias remodelacións recentes que a dotaron dunha grande área recreativa con bancos, fontes, parque infantil, pista de patinaxe e unha senda de paseo, polo que é un lugar axeitado para acudir en familia.

A programación no Chiringuito da ETEA continúa durante todo o mes de maio:

• Domingo 3 ás 18:30 h – Mala Herba
• Sábado 9 ás 20:00 h – Bela & Charlo
• Sábado 16 ás 20:00 h – Coverlovers
• Sábado 23 ás 20:00 h – Ani Baires
• Sábado 30 ás 20:00 h – Poligamia