Os días 3 e 4 de xullo, o Centro Comercial Camelias reunirá vendedores particulares con centos de artigos de segunda man, roupa, pezas de coleccionismo, decoración, libros, tecnoloxía e obxectos vintage.

Coa chegada do verán, Vigo suma un novo plan para quen goza descubrindo oportunidades únicas. O Centro Comercial Camelias celebrará os próximos 3 e 4 de xullo o seu primeiro Garage Sale Market, un mercado de segunda man no que os visitantes poderán atopar desde obxectos vintage e pezas de coleccionismo ata pequeno mobiliario, enxoval do fogar, tecnoloxía, roupa, xoguetes e complementos a prezos moi atractivos.

Durante dúas xornadas, os corredores da planta baixa de Camelias transformaranse nun auténtico mercado de achados inesperados, onde cada posto agochará pequenas xoias á espera dunha segunda vida.

A iniciativa nace co obxectivo de fomentar a reutilización e o consumo responsable, pero tamén de ofrecer unha experiencia de compra diferente, baseada na procura de oportunidades e de pezas difíciles de atopar nas canles comerciais habituais. «Queremos que a xente veña con tempo, rebusque e goce. Un Garage Sale sempre ten ese compoñente de sorpresa: nunca sabes que tesouro podes atopar no seguinte posto», explican desde a organización.

Ademais de ser unha oportunidade para conseguir auténticas gangas, o evento permitirá apoiar unha forma de consumo máis sostible, dando unha nova vida a obxectos que aínda teñen moito que ofrecer. Nunha época do ano na que a axenda se enche de praias, terrazas e festivais, o Garage Sale Market preséntase como unha alternativa orixinal para pasar unha mañá ou unha tarde diferente, na procura dese obxecto especial que aínda non sabías que estabas buscando.

Garage Sale Market
📍 Planta baixa do Centro Comercial Camelias (Vigo)
📅 3 e 4 de xullo de 2026
🕥 Horario: de 10:30 a 14:00 e de 17:00 a 20:00 horas
🎟️ Entrada gratuíta