Tras o éxito da primeira edición, á que acudiron preto de 1.500 persoas, chega este sábado 8 de novembro de 2025 a segunda edición do Magosto en Comesaña, unha festa popular que durante toda a xornada encherá de música, animación e convivencia a parroquia de San Andrés de Comesaña. O evento celebrarase baixo unha gran carpa instalada no Torreiro de San Andrés (ver ubicación), garantindo así o desfrute da xornada independentemente do tempo.
A programación comezará ás 12:30 horas coas Pandereteiras Nautilius, seguidas ás 13:00 polas Pandereteiras As Rabudiñas. A partir das 14:00, a Charanga Excombro poñerá o toque máis festivo antes do xantar popular previsto para as 14:30.
Pola tarde, a partir das 17:30, actuará o Grupo de Baile Folclórico Froles Novas, seguido do reparto de castañas ás 18:00 e do espectáculo infantil Asacocirco ás 18:30, pensado para o goce dos máis pequenos. A xornada continuará ás 19:45 cunha mostra de regueifas, nunha homenaxe á tradición oral galega.
A música volverá tomar protagonismo na noite coa enerxía do concerto pop- rock de KomoAyer ás 22:00, para rematar coa sesión de DJ Rym ás 23:30, que porá o broche final a un día de festa en San Andrés de Comesaña.
O II Magosto en Comesaña consolídase así como unha cita imprescindible no calendario festivo de Vigo, combinando tradición, gastronomía e diversión nun ambiente familiar e participativo.