Os artistas Javier Lago e Carla Lourdes presentan ‘San Sebastián’, un novo sinxelo que marca o inicio dunha etapa creativa para ambos. O tema, que se publica o 10 de abril, é o primeiro adianto do próximo traballo discográfico de Lago, que se irá desvelando ao longo de 2026.

A estrea celebrarase cun evento exclusivo este venres no Bocana Music Bar, a partir das 20:00 h. A cita incluirá un pequeno showcase en directo e ofrecerá ao público a oportunidade de participar na gravación da secuencia final do videoclip. Ademais, como incentivo, as primeiras 20 persoas que asistan e compartisen previamente a canción nas redes sociais recibirán unha consumición gratuíta.

‘San Sebastián’ preséntase como un himno indie-pop producido por Raúl Ben, colaborador habitual de ambos artistas, e mesturado por Lucas Piedra Cueva, coñecido polo seu traballo con nomes destacados como Jorge Drexler, Xoel López ou Valeria Castro. No caso de Javier Lago, este lanzamento chega tras o éxito do seu álbum debut, Perdón por las molestias, que o levou a escenarios de festivais como Río Verbena, Festival da Luz ou Surfing The Lérez. Con este novo sinxelo, o artista dá comezo a un ano cheo de novidades que culminará cunha serie de concertos por toda Galicia, incluíndo a súa actuación o 20 de maio en Santiago de Compostela dentro do ciclo Noitinhas.

Pola súa banda, Carla Lourdes continúa consolidando a súa carreira tras a boa acollida do seu primeiro traballo, El día que descubrí el lunar de tu oreja. A súa participación neste sinxelo reforza o seu posicionamento como unha das voces emerxentes máis destacadas do pop estatal.Esta colaboración supón unha mostra do bo momento que atravesa o pop de autor en Galicia. ‘San Sebastián’ perfílase así como un dos lanzamentos clave da tempada, abrindo un 2026 no que ambos artistas seguirán revelando novos proxectos.