Inauguración 'LODEIRO'

José Lodeiro (1931 – 1996) é historia viva da arte contemporáneo en Galicia. Desde as xa míticas exposicións ao aire libre da Praza da Princesa en Vigo a finais dos anos sesenta, ou a súa participación nas actividades do grupo Atlántica, xerme de tantas experiencias fundamentais no desenvolvemento da nosa plástica máis arriscada e innovadora, a figura de Lodeiro non cesou de crecer e descubrirnos novos territorios, como artífice pioneiro e posto avanzado da mirada contemporánea.

Unha traxectoria vital e artística marcada pola rebeldía estética e a conciencia social, dous polos ao redor dos cales toda a súa obra gravita, manténdose fiel a unhas constantes expresivas, desenvolvendo paso a paso unha linguaxe propia. Así, a interrelación de espazo e luz, os riscos cromáticos máis extremos, as estratexias xeométricas dunha paixón expresionista que musicalmente se contén, un lume interior que se mantén en repouso para mellor gozarse, ou o silencio metafísico das súas últimas arquitecturas, cada un dos trazos específicos achega a súa enerxía ao conxunto: configura o retrato dun artista total, un referente ineludible da nosa pintura máis universal.

O conxunto de obras que presentamos en SVT Espazo de Arte corresponde a unha serie de traballos realizados en plena madurez, unhas obras singulares, nas que abandona o que fose un dos seus procedementos técnicos máis característicos: os pigmentos aglutinados con pedramol e aplicados minuciosamente con espátula. Agora a cor gaña lixeireza e transparencia, a pincelada vai e vén despreocupada e xoga coas dinámicas do trazo, liberada do rigor xeométrico que impoñían as súas composicións ópticas ou cinéticas. Unha estrutura básica de eixos axiales e medias diagonais organiza os campos de cor agudizando os acedos contrastes que sempre caracterizaron á súa pintura.