A Escola Municipal de Artes e Oficios de Vigo inaugura unha mostra que conmemora a traxectoria dunha das institucións educativas e culturais máis emblemáticas da cidade. A inauguración terá lugar nun proxecto comisariado polas mestras Sandra de Jesus (Ourivaría) e Esther Quintas (Cerámica artística), que busca render homenaxe ao legado da escola desde unha mirada contemporánea.

A exposición nace como unha celebración colectiva dos 140 anos da institución, fundada en 1886 coa intención de ofrecer formación técnica e artística á clase obreira viguesa. A través de doce pezas creadas desde as once especialidades actuais da EMAO e a Biblioteca, a mostra propón unha lectura artística da súa propia historia, afastándose da visión máis institucional. As obras funcionan como unha homenaxe aos mestres, ao alumnado e ás xeracións que pasaron polas súas aulas, reinterpretando a memoria da escola mediante diferentes linguaxes creativas e disciplinas.

A mostra poderá visitarse ata o 16 de outubro no Espazo EMAO, con entrada polas rúas Pontevedra e Rosalía de Castro. O horario será de luns a venres de 19:00 a 21:00 horas ata o 30 de xuño e do 15 de setembro ao peche da exposición. Durante o verán, do 1 de xullo ao 14 de setembro, abrirá de 10:30 a 13:30 horas. O mes de agosto permanecerá pechado.