O restaurante Voltarei aposta de novo pola arte coa inauguración da súa primeira exposición permanente de debuxo, Anatopeyas, da man da artista Carola Bouza. O xoves 17 de xullo ás 19:00 h ábrese a mostra, que permanecerá no local ata o 18 de setembro.

A gastronomía e a arte únense neste evento no que a artista Carola Bouza relata o proceso creativo das súas obras, á vez que o restaurante Voltarei presenta unha bebida especial inspirada na exposición.

A exposición pretende ser unha experiencia interactiva, empregando un bote de cristal para que o público comparta as súas reflexións. Estas notas serán empregadas nun obradoiro artístico, impartido por Carola o 3 de setembro. O obxectivo é que os participantes creen as súas propias obras, expostas durante as últimas dúas semanas da mostra.