O venres 21 de agosto, ás 21:30 horas, La Pecera de Vigo acollerá o concerto de IL Harmonica Trio, unha formación que propón unha viaxe pola música sudamericana a través dunha combinación pouco habitual de harmónicas orquestrais, piano e voz.

O repertorio do trío percorre distintos xéneros e tradicións do continente, desde o tango e a milonga ata ritmos folclóricos de Arxentina e Uruguai, pasando pola enerxía do choro brasileiro, a elegancia do vals peruano ou o groove do son caribeño. Todo iso complétase coa influencia do jazz e o seu espírito improvisador, presente tanto na maneira de interpretar como na inclusión de estándares de jazz e fusión.

A proposta combina composicións propias e obras doutros autores, reinterpretadas con arranxos do propio grupo para construír un son persoal no que conviven tradición, emoción e espontaneidade.

Ademais da súa actividade sobre os escenarios, IL Harmonica Trio desenvolve tamén unha importante vertente divulgativa e educativa arredor das harmónicas orquestrais, con talleres, clases maxistrais e concertos interactivos.