A parroquia viguesa de San Andrés de Comesaña celebrará este domingo 23 de agosto a súa I Xuntanza Cabalar, unha xornada pensada para reunir afeccionados ao mundo do cabalo arredor dunha ruta, comida popular, probas de habilidade e sorteos.

A recepción dos cabaleiros está prevista para as 9:00 horas, con saída desde Estrada Casas, 38, en Vigo, baixo a ponte da VG-20. A organización advirte de que o percorrido non está pensado para carros, polo que a actividade está orientada aos participantes a cabalo.

A programación continuará pola tarde coas xincanas, que porán a proba a habilidade dos participantes. Ás 16:30 horas celebrarase a proba de habilidade e ás 17:30 horas, a de paralelas. Haberá premios para os mellores e sorteos para todos os participantes.

A parte gastronómica tamén terá protagonismo. A metade da ruta ofrecerase un pincho por 5 euros, mentres que ás 14:00 horas terá lugar a comida, cun menú de 25 euros composto por ensalada mixta, pincho de tortilla, churrasco con cachelos, bebida e sobremesa. Para os menores de 12 anos, o menú terá un prezo de 15 euros.

A actividade está organizada pola Comisión de Festas do Rosario e require preinscrición obrigatoria a través de WhatsApp no 711 755 546. O prazo indicado pola organización remata o 19 de agosto.