A Academia Compass acolle o ‘Festival Jóvenes Intérpretes’ en colaboración coa pianista e pedagoga lituana Rasa Biveiniene. Este ciclo de concertos está deseñado para poñer en valor o talento de mozos e mozas intérpretes de entre 13 e 22 anos. Esta iniciativa une a estudantes de Conservatorio con alumnos autodidactas da propia academia, algúns dos cales xa foron galardoados en certames internacionais. O obxectivo do festival é romper coa frialdade académica das audicións e exames tradicionais, creando un espazo de proximidade co público onde predomine o benestar, a contemplación e o gozo da beleza musical froito de moitas horas de estudo e disciplina.

Máis alá da exhibición artística, o evento serve para reivindicar as múltiples melloras cognitivas e aptitudes para a vida —como a atención, a xestión emocional ou os reflexos— que aporta a aprendizaxe profesional ou afeccionada dun instrumento.

PROGRAMA:

Sábado 20 de xuño ás 19:00 h – David Sousa (piano)
Venres 26 de xuño ás 19:00 h – Ariana Pérez (piano) e Miguel González (piano)
Domingo 28 de xuño ás 11:30 h – Uxía Moráguez (violonchelo) e Cecilia Moráguez (piano)
Sábado 4 de xullo ás 19:00 h – Jorge Pazó (voz) e Helena Fernández (piano)

Debido ao formato íntimo da sala, as prazas son moi limitadas e é imprescindible realizar reserva previa chamando ao teléfono ou por whatsapp 616 800 497.