As festas patronais de Coia, as máis multitudinarias do verán vigués cun centenario de historia, viviron en xuño días de incerteza que case provocan a súa cancelación. A negativa inicial do Concello de Vigo a autorizar o evento por deficiencias no Plan de Autoprotección puxo en risco a súa celebración. Tras unha revisión do plan e un acordo de última hora entre Concello e Comisión de Festas, o evento seguirá adiante, aínda que con cambios importantes respecto a edicións anteriores.

Que queda fóra do programa?

O cambio máis significativo é a eliminación total das atraccións mecánicas, tanto para nenos como para adultos. Tampouco haberá fogos artificiais, inicialmente previstos para a noite do sábado 5 de xullo. No acordo acadado entre ambas partes establécese que o Concello farase cargo nesta edición das perdas ocasionadas por non instalar as atraccións, fonte de ingresos para a Comisión.

Que se mantén?

A pesar dos recortes, a verbena consérvase case na súa totalidade. As orquestras, agrupacións folclóricas, bandas de música e DJs actuarán segundo o previsto tras reubicarse os escenarios para cumprir coas esixencias de aforo e vías de evacuación.

Entre os pratos fortes destacan o pregón a cargo de Fillas de Cassandra, o Festival de DJs “Ida de Coia” con artistas como Michenlo e Groove Amigos (ambos o venres 4 de xullo), e a esperada actuación da Orquestra Panorama, (martes 8 de xullo), cando se esperan 18.000 persoas na esplanada de Coia.

Programa completo:

Venres 4 de xulllo:

• 20:00 h: Actuación dos grupos Jazz Vigo e Club Deportivo Espiral Breaking Vigo.
• 21:00 h: Pregón de Fillas de Cassandra (María Soa e Sara Faro)
• 22:00 h: Verbena a cargo do grupo Nostalgia
• 00:00 h: ‘Ida de Coia festival’: DJs Michenlo; Groove Amigos; Marcos Gramola; Dmiron.

Sábado 5 de xullo:

• Pasarrúas a cargo da Charanga Vai de Baile.
• Actuación da Banda de Música Unión Musical de Valladares.
• Actuacións Solara e Pontevedra.

Domingo 6 de xullo:

• Actuación da Banda Escola de Música de Beade.
• Actuación do grupo de baile rexional Peña Xuntanza.
• 20:00 h: Misa solemnre seguida de Procesión.
• Concerto na Plaza a Consolación da Banda Escola de Música de Beade
• Actuacións Fania Blanco Show e Tango

Luns 7 de xullo:

• Pasarrúas a cargo da Charanga Vai de Baile.
• Actuación da Unión Musical de Coruxo.
• Actuación do Grupo Pandereteiras A Foliada Vai Boa, Axóuxeres e O Cascarexo da A.A.V.V O Torreiro de Coia.
• Actuacións Gran Parada e Cinema.

Martes 8 de xullo:

• Pasarrúas a cargo da Charanga Vai de Baile.
• Actuación da Banda de Música de Salceda de Caselas.
• Actuación do Grupo Pandereteiras O Tangaraño e do Grupo Ecos do Xandre.
• Actuacións Satélite e Panorama.

Mércores 9 de xullo:

• Pasarrúas a cargo da Charanga Vai de Baile.
• Concerto da Banda de Acordeóns Metropolitana de Torroso (Mós).
• Celébrase o ‘Día do neno’ con prezos especiais nas atraccións.
• 19:00 h: gran concurso de cucañas, coa entrega de premios e obxequios da man do Paiaso Popín, dirixido ao público familiar.

Ademais, o mércores 9 haberá unha hora silenciosa, de 19:00 h a 20:00 h, para crear un ambiente accesible para persoas con autismo e outras condicións de hipersensibilidade sensorial, reducindo os estímulos como música ou ruidos.