A Asociación de Veciños do Casco Vello celebra esta fin de semana a 44ª edición da Festa dos Maios, unha das celebracións máis ancestrais e coloridas de Galicia, centrada en festexar a chegada da primavera, o renacer da natureza e o fin do inverno a través de elementos florais e música. Na praza do Berbés, esta tradición revívese con especial forza cunha xornada festiva que enche o barrio histórico de vida con obradoiros infantís, bailes tradicionais e un xantar popular. O gran atractivo da cita son os propios ‘maios’ esculturas artísticas feitas con musgo, fiuncho e flores e as tradicionais coplas con retranca, acompañadas polas actuacións de grupos folclóricos locais.

O acto central do evento terá lugar ás 18:00 h cunha representación dramatizada. Este teatro, creado pola asociación a comezos do 90, ten dous protagonistas: O inverno que será o primeiro en aparecer, acompañado dunha música lúgubre e imaxes que invocan o mal, como os machos cabríos ou os corvos; e a primavera que sairá despois nunha plataforma adornada con flores e acompañada por danzas tradicionais de cintas e arcos. Despois da disputa, na que o inverno resístese a marchar, a primavera acaba gañando e é, entón, cando entra en escena o cuco, cuxo canto anuncia a chegada do tempo cálido. A continuación, aparece o Maio, unha enorme construción floral armada polos propios veciños.

PROGRAMACIÓN

11:00 h – Obradoiros infantís

13:00 h – Actuación de As Perseidas do Berbés

14:00 h – Xantar popular

16:00 h – Obradoiro de baile tradicional con André Adrio

17:30 h – Banda de Gaitas do Casco Vello

17:50 h – Entrega de premios do concurso de fotografía da Reconquista

18:00 h – Entrega do Maio de Honra e representación dramatizada dos Maios, co Trebón do Berbés, O Baluarte e A Barroca

19:00 h – Actuación de As Ferreñas da Oliveira

19:30 h – Concerto de Vacaloura Vermella