Esta asociación cultural e veciñal leva desde o ano 2017 artellando barrio na zona da Industria en Vigo. A entidade aposta por recuperar a convivencia veciñal e a protección do patrimonio industrial e os espazos naturais, promovendo o seu coñecemento para fortalecer o sentimento de pertenza e preservar a historia local.

O colectivo traballa para que a cultura non se focalice só no centro da cidade, achegándoa aos lugares de residencia de xeito gratuíto para evitar a exclusión de sectores como as persoas maiores ou con menos recursos. Para logralo, dinamizan o barrio con festas tradicionais, obradoiros, murais e roteiros culturais.

A través da colaboración de voluntariado, o pequeno comercio e organizacións como a cooperativa Árbore, A Morada ou Beiramar da Xente, buscan tecer unha rede humana que ofreza unha programación de calidade, en galego e con valores feministas, inclusivos e ecoloxistas. Entre as súas actividades destacan:

• Unha actuación e obradoiro de regueifa sobre Begoña Caamaño con Branca Trigo Cabaleiro e Silvia Villar.
• Unha foliada co grupo de pandereteiras e bailes de serán de ‘A Morada’.
• Postos de exposición e venda de libros coas librarías do barrio ‘Sequeiros’ e ‘A Klandestina’.
• Paneis explicativos sobre a figura da escritora Begoña Caamaño.