A Carballeira de Velar volve converterse nun gran escenario natural para celebrar a 41ª Festa da Carballeira de Zas, unha das citas máis veteranas da música folk en Galicia e declarada Festa de Interese Turístico de Galicia. Durante dous días, a programación combinará música tradicional, folktrónica, propostas internacionais, actividades familiares e a habitual foliada popular baixo os carballos.

A edición de 2026 aposta especialmente polo diálogo entre tradición e vangarda. O venres compartirán escenario a música de raíz castelá de El Nido, a electrónica conectada co folclore galego de Baiuca e o clarinete bretón de David Pasquet. O sábado será unha longa xornada que comezará con propostas familiares e continuará coa foliada, os concertos de Alana, Radio Cos, Backwest e Fillas de Cassandra, e o peche de Señora DJ.

Ademais dos concertos, o sábado haberá feira de artesanía e mercado ecolóxico de 12:00 a 22:00 horas, oferta gastronómica, animación e inchables para a cativada. O recinto contará tamén con baños portátiles, asistencia sanitaria e un punto violeta na entrada principal, activo de 22:00 a 04:00 horas, ademais de persoal formado en lingua de signos. O festival aposta polo vaso retornable, a recollida selectiva e os produtos locais.

A acampada é gratuíta e dispón de tres zonas diferenciadas: unha para tendas e dúas para caravanas e campers. Non é necesario reservar e poderá utilizarse desde o día anterior. As duchas con auga quente do polideportivo abrirán o sábado de 10:00 a 12:00 e de 18:00 a 20:00 horas, e o domingo de 10:00 a 12:00 horas.

Non se permite introducir vidro, bebidas ou comida no recinto, agás auga e alimentos para crianzas ou persoas con intolerancias e necesidades especiais. Os menores deben acceder acompañados dunha persoa adulta e coa documentación ou autorización correspondente.

Programa e horarios

Venres, 7 de agosto

• 22:00 h — El Nido
• 00:00 h — Baiuca
• 01:30 h — David Pasquet

Sábado, 8 de agosto

• 12:00 h — Paco Nogueiras
• 14:30 h — Xabier Díaz & Adufeiras de Salitre
• Pola tarde — Cé Orquestra Pantasma e Mago Teto
• 18:00 h — Inicio da foliada, coa participación de Do Rivés, Os Argalleiros, Os Campantes da Baña, Os Petadores e Chorima
• 20:30 h — Alana
• 22:00 h — Radio Cos
• 23:30 h — Backwest
• 01:00 h — Fillas de Cassandra
• 02:30 h — Señora DJ

ENTRADAS AQUÍ