A exposición “Vigo. Luz e cor” reúne pinturas de José María Barreiro nas que se representan escenas de circo, músicos, bodegóns e paisaxes urbanas, así como composicións vinculadas ao mar e á viaxe. Tamén se exhibe o motivo da xanela, entendido como símbolo de conexión entre o mundo interior e o exterior do artista.

A mostra inaugúrase o xoves 19 de febreiro e poderá visitarse na Casa das Artes ata o 26 de abril. O alcalde destacou que se trata dunha gran exposición dun mestre da pintura e convidou a toda a cidade a gozar da obra de Barreiro. Vigo constitúe un eixo fundamental na súa obra pola súa xeografía e urbanismo, así como pola permanencia do artista na cidade, onde ten taller desde 1964. Barreiro integrouse cedo nos ambientes culturais vigueses, relacionouse con Lugrís e Laxeiro e, tras unha estancia de catro anos en Bos Aires, regresou a Vigo en 1974 consolidando un universo pictórico no que destaca o predominio da cor.

Horario de visita: de luns a venres de 18:00 a 21:00, sábados de 12:00 a 14:00 e de 18:00 a 21:00, e domingos e festivos de 12:00 a 14:00.