A Escola Municipal de Artes e Oficios de Vigo celebra os seus 140 anos cunha exposición especial que rende homenaxe á súa historia, ao seu alumnado e ás especialidades que forman parte do centro. A mostra reúne 12 obras creadas arredor das once disciplinas que se imparten actualmente na EMAO e da súa biblioteca, converténdose nun percorrido artístico pola memoria e a evolución dunha institución clave na formación da cidade. As pezas nacen dunha mirada interna sobre a propia escola, transformando a súa historia e identidade en propostas artísticas elaboradas con dedicación e oficio.

A exposición poderá visitarse no Espazo EMAO entre o 19 de xuño e o 16 de outubro de 2026, con entrada polas rúas Pontevedra e Rosalía de Castro. O horario será de 19:00 a 21:00 horas entre o 19 e o 30 de xuño e do 15 de setembro ao 16 de outubro, mentres que entre o 1 de xullo e o 14 de setembro abrirá de 10:30 a 13:30 horas. Permanecerá pechada durante o mes de agosto.