Exeria + Electric Läger

A xira “Sobre a independencia” da banda Exeria, chega ao seu fin. Este conxunto procedente do Condado ten viaxado practicamente por toda Galicia, pisando as principais cidades e moitos núcleos rurais. O Sábado 28 actuaran na Sala Kominsky (R/ Irmandiños nº3, Vigo) como acto final, acompañados por Electric Läger, cos que xa teñen compartido noites de suor e decibelios. Destilan unha mistura de hard blues e rock´n roll salvaxe e co seu contundente directo non deixan indiferente a ninguén.

Para os que non os coñezan, Exeria forma parte da nova xeración de músicos amantes das guitarras e do rock. Combinan xéneros como o grunge e o britpop, dándolle un novo xiro coa súa propia fórmula. Non contenta con isto, a banda segue abríndose a novas influencias e asimilando música que a priori queda fóra do seu radar estilístico.Así o demostra no seu novo traballo Sobre a independencia, un EP de 5 cancións que se publicou o pasado mes de Marzo. Acompáñouse dun videoclip pertencente á canción A Costa de Frades e facturado polo equipo de Trece Amarillo, realizadores de videoclips para artistas como Tanxugueiras ou Carlos Núñez.