A Asociación Érguete centra este 8M nos retos que afrontan as mulleres con problemas de adiccións ao acceder a servizos asistenciais que, aínda hoxe, están deseñados principalmente para homes. A entidade viguesa organiza cinco actividades esta semana, unha por día, para visibilizar e dar voz a estas mulleres a través da arte e dunha serie de reivindicacións nas rúas do Calvario.

O xoves, día 5 de marzo, a escritora Xulia Alonso impartirá un taller de escritura terapéutica para as mulleres usuarias da Asociación. O obxectivo é axudalas a usar as palabras para reflexionar sobre si mesmas e dotalas de ferramentas para que poidan denunciar a súa situación.

A actividade súmase ás iniciativas realizadas durante toda a semana:

• Luns: usuarias e persoal confeccionaron broches artesanais con mensaxes que se poden colocar en roupa e mochilas.
• Martes: ás 11:30 h, colocáronse na rúa Martínez Garrido siluetas de mulleres a tamaño real para visibilizar a súa invisibilidade nos recursos asistenciais.
• Mércores: tamén na rúa Martínez Garrido ás 11:30 h, usuarias e persoal debuxarán dous camiños con pedras, un curto para simbolizar o percorrido dos homes polos recursos e outro longo, con obstáculos escritos, para representar as dificultades que atopan as mulleres.
• Venres: ás 12:00 h, organizarase na Praza da Memoria unha performance conxunta coas entidades de Social Calvario para denunciar os estigmas que sofren as mulleres en risco de exclusión.

A Oficina É Muller da Asociación Érguete é un programa específico para apoiar mulleres con problemas de adiccións e combater a desigualdade nos servizos de tratamento. As súas profesionais atenden na sede da Asociación en Vigo, no centro penitenciario de A Lama, Teixeiro e nalgúns centros de saúde da área metropolitana. Ademais, traballan tamén coas familias das persoas usuarias, poñendo o foco na contorna que lles rodea.