A nosa cidade acolle desde novembro de 2024 un espazo de creación único que redefine a aprendizaxe artística e ofrece un ambiente de libre expresión baseado nos descubrimentos do pedagogo francoalemán Arno Stern. En El Atelier de Expresión nenos e adultos pintan sen xuízos nin presións, co fin de fomentar unha profunda conexión co seu eu creativo.

A fundadora deste taller, Cristina González, é unha restauradora de pintura antiga á que, malia non ter formación académica a nivel artístico, sempre lle encantou pintar e debuxar. A súa propia viaxe autodidacta conectou fortemente co traballo de Arno Stern, quen, ao longo de máis de sete décadas, se dedicou a investigar sobre a libre expresión a través da pintura.

A metodoloxía de El Atelier xira arredor do «xogo de pintar», que ten lugar no que Stern bautizou como o Closlieu, un espazo pechado e protexido onde a pintura se libera da comunicación e da interpretación subxectiva.

Para coñecer máis arredor da Educación Creadora, do legado de Arno Stern e da vertente lúdica de pintar, Cristina organiza tres charlas no propio local (Rúa de Zamora, 51), todas ás 17:00 h:

• Venres 12 de setembro: “El juego de pintar. Un acercamiento a la Educación Creadora y a la figura de Arno Stern”.

• Venres 19 de setembro: “Las condiciones de la Educación Creadora”

• Venres 26 de setembro: “El juego. Un derecho en vías de extinción”

O aforo para as charlas é reducido e é preciso inscrición previa no 623 187 457 ou hola@ateliereducacioncreadoravigo.com