A banda viguesa ‘Sun Iou’ presenta o seu segundo disco, “Egos”, un traballo que supón unha evolución tanto musical como conceptual. Cun enfoque colectivo, o álbum explora sons rock e punk combinados con voces femininas e gaitas, e propón unha reflexión sobre o individualismo actual fronte á forza da comunidade.

O grupo amosa tamén nos seus directos esa aposta polo colectivo, reivindicando a música compartida como un acto artístico e social.

Na presentación estarán acompañados polos composteláns Barbitúricos, coñecidos pola intensidade dos seus concertos, e por DJ Bolachas, que completará a xornada cunha sesión centrada no rock feito en Galicia.