Coloquio sobre 'En voz baja'

O mércores 27 de setembro celebrarase no local da asociación cultural Évame Oroza un coloquio arredor da novela «En voz baja», do escritor Antonio García Teijeiro. Durante o acto acompañarán ao autor Alba Piñeiro, tradutora ao galego de diversas obras de literatura infantil e xuvenil, e a editora Arantxa Amatriaín.

«En voz baja» é unha novela de personaxes que nos anima a entender dende o optimismo os comportamentos, por veces escuros, do ser humano. Trátase duna obra na que a literatura e a música teñen unha presenza destacada. A través do seu protagonista, o adolescente Roberto Núñez, transitamos por cancións, poemas e reflexións que o axudarán a atopar pouco a pouco a súa propia voz e o seu lugar no mundo. E sempre en voz baixa.

En 1998, García Teijeiro publicou esta obra en galego, en Edicións Xerais, e agora, 25 anos despois, chega esta novela ás nosas mans en castelán grazas a tradución de Antón García Fernández. A novela publicouse na primavera deste ano en Editorial Elvira e a portada é obra do artista Xulio García Rivas. O autor Antonio García Teijeiro (Vigo, 1952), poeta e narrador, acadou importantes premios literarios como o Premio Merlín, o Premio europeo Pier Paolo Vergerio da Universidade de Padua, o Luna de aire e, en dúas ocasións, formou parte da Lista de Honra do IBBY, ademais doutros galardóns como o I Premio de Poesía erótica Illas Sisargas. En 2017, concedéronlle o Premio Nacional de Literatura Infantil e Xuvenil polo poemario «Poemar o mar» (Ed. Xerais), libro co que gañou o Premio Fundación Cuatro Gatos (Miami, 2018).

Entre os seus máis de 80 libros publicados, podemos destacar: «Na fogueira dos versos», «Paseniño, paseniño», «Chove nos versos», «Na agonía dos outonos en silencio», «Poesía cromática», «Presenzas marcadas», « la Trilogía del mar» o a antoloxía «Dijo el ratón a la luna» (poesía); «A teima de Xan», «Os peixes de cores» o «Trala liña do horizonte» (narrativa). Con Editorial Elvira publicou en 2022 o libro «Se falases de min».