O Teatro Ensalle acolle un espectáculo de Cintaadhesiva, un dúo de e-poesía (poesía con música electrónica) composto por Jesús Andrés (vídeo e son) e Silvia Penas (voz). O espectáculo promete ser unha experiencia moi completa, de grande intensidade, que destaca polo seu posicionamento feminista e crítico. En definitiva, trátase dunha reflexión profunda acerca da vida e das formas de actuar do ser humano.

O proxecto Cintaadhesiva parte dunha estreita relación cos diferentes usos da cinta americana, fiso, blu tack e outro tipo de sistemas de fixación e ensamblaxe (agás o loctite e demais fluídos non flexibles), e a súa faceta para unir e superpoñer, sempre sobre unha base porosa e escorregadiza. Disciplinas como poesía, música, videoarte e posta en escena reméndase unhas ás outras nun espectáculo pensado para o directo e para a acción, pois xorde da intención de apelar á escoita e á visión, así como a outras partes sensibles e sensoriais do corpo para que se produza unha vivencia.

Ten como base os ámbitos literario e musical, xa que se trata dun proxecto orixinal dunha poeta e dun músico. Unha parte importante do conxunto son textos poéticos integrados na música (non acompañados). Tamén, intercálanse temas cantados compostos polos mesmos autores.

RESERVA AS TÚAS ENTRADAS AQUÍ.