CICLÓN POP

O ciclo do indie verdadeiro

Ciclón Pop nace como un refuxio para o pop independente feito con mimo, personalidade e cancións que importan. Un ciclo de concertos en Casa de Arriba (Vigo) que aposta por proxectos con identidade propia, lonxe de modas pasaxeiras e algoritmos.

Durante a primavera, o ciclo reunirá algunhas das propostas máis especiais do indie pop estatal, nun formato próximo e coidado, pensado para gozar da música como merece.

---

Andrea Buenavista

11 de abril

Andrea Buenavista chegou para facerte chorar cuns auriculares enredados, no metro ou nun Alsa á medianoite. Pero tamén para facer rir e conectar con ese humor amargo que aparece cando o amor se mira con distancia.

Crooner contemporánea de voz grave e actitude despreocupada, canta sobre despeito, mentiras, corazóns baleiros e situacións cotiás que só a tristura sabe converter en comedia. En 2019 debutou en solitario con Alguien mejor, e tras pasar por bandas como Los Lagos de Hinault ou Bar España, publicou en 2023 Antojitos (Sonido Muchacho): tres cancións breves, intensas e directas ao peito.

Armada cunha guitarra española, pode soar a ranchera, a cantautora rock dos 70 ou a bolero emocional sen artificios nin poses. Andrea reivindica a vulnerabilidade e o cotián cunha chulería aprendida en bares de racións e madrugadas longas.

Entradas
Prezo: 10,20 €

---

Tronco

15 de maio

Tronco é o proxecto musical da barcelonesa Conxita Herrero. Cancións sinxelas, honestas e luminosas que beben do pop naïf, da poesía cotiá e da emoción sen filtro.

Conxita debuxa, fai fanzines, escribe poemas e cancións. En 2017, Elefant Records editou Abducida por formar una pareja, consolidando a Tronco como unha das propostas máis persoais e entrañables do pop independente actual.

Conta co apoio de Vibra Mahou, a plataforma musical de Mahou Cinco Estrellas, que impulsa experiencias cinco estrelas arredor do directo.

Bono triple 28,00 €