Con motivo do Día Europeo da Música, El Corte Inglés organiza un concerto de Chungo Pastel, na marquesiña da Gran Vía.

Coincidindo co solsticio de verán, Europa celebra o 21 de xuño o Día Europeo da Música, unha xornada dedicada á reivindicación e promoción da música como linguaxe universal da humanidade. A orixe desta celebración remóntase a 1976, cando o músico Joël Cohen, propuxo celebrar os «Saturnais da música» os días 21 de xuño e 21 de decembro. Na primeira edición, bandas e músicos saíron ás rúas de Toulouse a tocar durante a noite do 21 de xuño.

Chungo Pastel, a formación musical nada das actividades da Fundación Igualarte, tocará cancións do seu novo disco Sin filtro. Juan Bartolomé á guitarra; Roi Garrido na batería e Carmen Gómez tocando o baixo, acompañados pola súa profesora e tamén integrante do grupo Jimena Maguna, interpretarán cancións como ‘Musgo’ (un tema dedicado a Galicia) ou ‘Paralelos’ (cunha importante mensaxe á sociedade no que reivindican “vivir como o resto da xente”).

Un dos obxectivos da Fundación Igualarte é que o seu alumnado, con diversidade funcional, se integre socialmente a través da cultura, perseguindo, tamén, a súa profesionalización.