A Ría de Vigo converterase entre o 11 e o 14 de xuño nun gran escenario de experiencias náuticas, turísticas, deportivas e culturais coa celebración dunha nova edición do Festival Azul, unha iniciativa impulsada polo Clúster Náutico Rías Baixas para achegar o mar á cidadanía.

Durante catro días, o público poderá participar en actividades para todos os gustos, desde bautismos de vela, surf, paddle surf ou dragon boat ata propostas máis relaxadas e divulgativas como visitas ao Hidria Segundo, o Observatorio Nautilus, obradoiros de identificación de algas ou cruceiros pola ría.

Como novidade desta edición destaca a regata solidaria Velas polo Alzheimer, unha cita que combina a paixón pola navegación coa sensibilización arredor desta enfermidade.

A maioría das actividades contan con prazas limitadas e requiren reserva previa. A información detallada de cada proposta e o acceso aos formularios de inscrición están dispoñibles na web do festival.