Boneflower é un trío madrileño que nace a mediados de 2015, composto por Eric Montejo (guitarra e voz), Jaime Díaz (batería) e Rubén Desan (baixo). O seu son oscila entre o post rock máis atmosférico e ambiental, o post hardcore máis caótico e o screamo máis estremecedor, con pequenas pinceladas de influencia indie.

Durante a súa traxectoria caracterizáronse pola súa filosofía DIY e pola súa enerxía en directo, o que lles levou a xirar pola Península Ibérica, Europa e Estados Unidos, e a publicar os seus lanzamentos, ata o momento dous LPs e dous EPs, xunto con varios sinxelos, con selos como Miss The Stars, Lifeisafunnything, Dog Knights, Zegema Beach e Saltamarges, entre outros. Agora chegan a Vigo para presentar en directo o seu último disco Reveries.