A Orquesta Clásica de Vigo continúa coa súa tempada 2025-26 durante o mes de marzo con dúas propostas culturais que combinan divulgación musical e creación contemporánea: un ciclo de conferencias e un concerto especial en Vigo.

O primeiro encontro terá lugar o 12 de marzo ás 19:00 horas na Biblioteca da Escola Municipal de Artes e Oficios de Vigo baixo o título “As pegadas do son”. Nesta xornada participarán o artista sonoro Miguel Fernández e o investigador Julio Gómez, que ofrecerán dúas conferencias centradas na evolución do son e da música gravada.
Miguel Fernández abordará a relación entre vibración, emoción e percepción musical na charla “Mecánica da emoción: da vibración ao son”, mentres que Julio Gómez analizará os inicios da gravación sonora na conferencia “Palabras conxeladas: da literatura á música gravada”, facendo referencia aos primeiros experimentos co phonoautógrafo.

A segunda cita será o 14 de marzo ás 20:00 horas no MARCO Museo de Arte Contemporánea de Vigo, onde a orquestra ofrecerá o concerto “Cuarteto para resonadores: Humanless”, unha proposta que combina música clásica e experimentación sonora. Neste proxecto, Miguel Fernández revisita a obra de Joseph Haydn desde unha perspectiva contemporánea, explorando a esencia física do son a través de resonadores e técnicas electroacústicas.

A actuación incluirá tamén a peza “Sentenza nº 4”, inspirada no Funeral da raíña Mary do compositor barroco Henry Purcell, reinterpretada mediante son sintético e electrónica, ampliando así as posibilidades estéticas do proxecto Humanless.

Estas dúas actividades buscan achegar ao público unha visión diferente da música, explorando tanto a súa historia como as súas posibilidades creativas na actualidade.

Entradas